En Unfall und vier Folgeunfäll uf de A1 hend geschter en lange Stau verursacht. Zeh Lüt sind zur Kontrolle ins Spital brochd worde.
Am Mentig, 14. Juli 2025, isch’s um Halbivieri am Namittag uf de A1 uf em Gmeindsbann vo Birmischtorf zu mehrere Unfäll cho. Aagfange hets, so schriibd d Kantonspolizei innere Mitteilig, mit ere Uffahrtkollission in Fahrtrichtig Bärn, wo zwöi Auto ufenand prallt sind. D’Fahrzüüg, wo hindedra gfahre sind, hend ned rechtzitig chönne bremse, drum hets vier witeri Uffahrunfäll geh – total sind 14 Auto beteiliged gsi.
Zeh Lüt sind mit de Ambulanz zur Kontrolle is Spital brochd worde. Di meischte hend nume lichti Verlezige gha, aber en 48-jährige Ma het sich de Chiefer broche.
De Sachschade liegd nach ere erschte Schätzig bi öppe 160’000 Franke.
Ei Fahrspur isch di ganz Ziit offe blibe, aber im dichte Vercher het sich gliichwohl en Stau bilded, wo sich über d’Kantonsgrenze use zoge het – meh wie zeh Kilometer lang. Nach längere Bergigs- und Reinigungsarbeite sind gege di sächsi am Abe wieder alli Fahrspure offe gsi. Bis de Vercher wider flüssig gloffe isch, hets aber rächt Ziit bruuchd.