Wil er es Rotliecht missachtet het, het de Fahrer voneme vollbsetzte Mietwage uf de Furttal-Chrüzig en heftige Unfall verursacht. Elf Lüüt sind verletzt worde.
De Unfall isch am Sunntig, 13. Juli 2025, churz nach de Halbiachti am Abe passiert. De Fahrer voneme Toyota Proace isch vo de A1 cho und het gradus Richtig Otelfingr Welle witerfahre, Dobei het de 79-jährig Maa s Rotliecht ignoriert und sis Fahrzüüg isch mit eme Audi Q5, wo vo Wettinge i Richtig Würelos underwägs gsi isch, zämmedätscht.
Im nünsitzige Mietwage isch e Reisegruppe us Uruguay gsi, wo zum Flughafe unterwegs gsi isch. Alli Insasse – drumter vier Chind zwüsche nün und zwölfi – sind zum Glück meh oder weniger licht verletzt worde. Bis uf ei Person, wo im Spital muess bliibe, sind alli als reisetauglich iigstuft worde. Au im Audi sind beidi Insasse verletzt worde. Mehri Ambulanze hend d’Verletzte i Spitäler drumume bracht. Beidi Auto hend en Totalschade.
D’Rettigs- und Ufrumarbeite hend zu Verchersbehinderige gfüehrt. Bis d’Unfallstell um Viertelabnüni grumt gsi isch, het d’Feuerwehr de Vercher umgleitet.