Am Sunntig, 28. September 2025 wird z Wettige u.a. de Gmeindrot gwählt. Au d SVP het jetzt ihre Kandidat bekanntgeh.
Bis am Fritig, 15. August 2025 um 12i am Mittag chönnd d Wahlvorschläg für di sibe Sitz im Gmeindrat iigreicht werde. Bis jetzt hend 11 Persone vo sibe Partei und ein Parteiloser ihri Kandidatur bekannt geh. Drü devo kandidiered au als Gmeindamme, vier als Vizeamme (dodezue chunnd dann jeweils en eigede Artikel).
Im Blick uf ihri politischi Usrichtig unterscheided sich di Kandidatinne und Kandidate dütlich. S politischi Spektrum isch vo rächts bis links abdeckd und alli Iiwohnerratspartei hend en Gmeindratskandidat oder e -kandidatin.
Vo de Bisherige kandidiered vier, nämli de Markus Hass und de Martin Egloff vo de FDP, d Kirsten Ernst vo de SP und de parteilos Philippe Rey. D Mitti versuechd ihri beidi Sitz, wo bisher de Roland Kuster und de Sandro Sozzi gha hend, mit em Roland Brühlmann und em Christian Wassmer z verteidige und d SP de Sitz vom Markus Maibach mit em Adrian Knaup. Zudem träted zwöi Partei mit Kandidature aa, wo aktuell ned im Gmeindrat verträte si, aber es scho gsi si: d Lilian Studer vo de EVP und de Markus Bader vo de SVP. S erschti Mol en Gmeindratssitz für ihri Partei erobere wend de Orun Pallit vo de GLP und de Jürg Meier Obertüfer vo WettiGrüen.