Vom 12. bis 22. Juni 2025 häd in Lausanne s 77. Eidgenössische Turnfest stattgfunde. De DTV Wettinge esch mit über 60 Turnerinnen us de Jugend- und Aktivenriege am Start gsi.
Am erste Wochenendi hed d Korbballmannschaft en beeindruckende 6. Rang i de Kategorie «Korbball Damen Elite» chönne erringe. Die 25 Gymnastinne vo de Jugendriege send ime drüteilige Wettkampf aatrette, händs Publikum be zwoi Gymnastikküre chönne begeistere und händ ihri Geschicklichkeit im Hindernisparcours chönne unter Bewiis stelle.
Am zwoite Wochenendi hed Damenriege ihres Könne i verschiedene Fachtests unter Bewiis chönne stelle. Zudem häd d Gymnastik-Aktiveriege und s Team Aerobic ame drüteilige Wettkampf teil gno und am Schluss händs de toll 19. Platz von insgesamt 329 Vereine chönne ergattere.
Mer gratuliered allne Turnerinne zu ihrer herusragende Leistig und send sehr stolz uf EUCH!