Zu de Sperrig vo de A1 in de Folg vom Fahrzüügbrand het d Kantonspolizei jetzt informiert. Vier Fahrzüüg hend brönd und vier Persone sind ins Spital brochd worde.
Am Fritigabe, 20. Juni 2025 gege di Föifüberhalbiachti am Abe het de Vercher uf de A1 Richtig Züri gstocked. Ursach isch schints es Pannefahrzüüg gsi, wo sehr langsam uf de Autobahn isch unterwägs gsi. Im stockende Kolonnevercher het es uf de zwöite Überholspur mehreri Uffahrunfäll geh, wobi eis Auto het aafange brönne. Wil d Fahrzüüg nöch bienand sind gstande, hend drü witeri aafange brönne.
Wegem Brand und em starche Rauch het d Autobahn in beidi Richtige müesse gsperrt werde. S Bundesamt für Strasse (ASTRA) het e grossrümigi Umleitig iigrichted.
D Lüt us de stehende Fahrzüüg bim Iigangsportal vo de Halbüberdachig Noiehof hend wegem Rauch ihri Fahrzüüg müesse verlah. Mehreri Ambulanze hend d diversi Persone wegem Verdacht vo Rauchgasvergiftig überprüeft und vier Petsone sind ins Spital brochd worde.
Öppe um Nüni am Abe hend erschti Fahrspure wider chönne göffned werde, aber erscht nachts um Eis hend wider alli Spure in beidi Richtige chönne frei geh werde, wil d Bergigs- und Ufruumarbeite komplex gsi si.
D Kapo het Ermittlige zu de Klärig vo de genaue Unfallursache ufgnoh. Au warum eis Auto het aafange brönne isch no ned klärt.