Z Wettige isch en junger Maa uf de Flucht vor de Polizei mit em Auto verunfallt. D Mitfahrer sind unverletzt blibe, de Fahrer isch verletzt ins Spital brochd worde.
Am Sonntig, 16. März 2025 kurz ab de 4i am Morge isch ere zivile Patrouille vo de Kantonspolizei Züri im Stelzetunnel bi Opfike en vollbsetzte Porsche Panamera ufgfalle, wo z schenll unterwägs gsi isch. D Zürcher Patrouille het en us dem Grund welle stoppe, de Fahrer hed aber s Haltezeiche missachtet und het Gas geh. Mit Blauliecht und Horn hed d Kapo Züri d Verfolgig ufgnoh. De Fahrzüüglenker isch uf de A1 Richtig Aargau devo und z Noiehof ab de Autobahn. In hohem Tempo isch er uf Wettige und het in de Kurve bi de Drehschiibe bim Bahnhof d Herrschaft über s Auto verlore und s Fahrzüüg het de Zuun durchbroche. Wo d Zürcher Polizischte churz druuf am Unfallort iitroffe sind, isch de Lenker am devorenne gsi. Zämme mit de Patrouillene vo de Kapo Aargau isch d Fahndig ufgnoh worde und de Flüchtend isch ufgschpürt und arretiert worde. Es het sich zeiged, dass de Fahrer uf de Flucht am Fuess verletzt het. En Ambulanz het de 20-jährig Maa ins Spital brochd. D Bifahrer im Auto, drü Fraue und en Maa im Alter vo 15 bis 18 sind unverletzt blibe.
Am Porsche isch en grosse Sachschade entstande, zudem isch de Zuun uf mehrere Meter beschädiged worde. D Kapo Aargau het die witere Ermittlige übernoh. Schnell het sich zeiged, dass de 20-Jährig kein Führeruswiis het und de Porsche eme Familiemitglied entwednet het. D Staatsaawaltschaft het e Strofuntersuechig eröffnet.