Am Mittwoch, 16. Oktober 2024 het de Iiwohnerrat sini erschti Budgetsitzig gha. D Reservesitzig vom Donnschtig het chönne abgsaid werde.
Bi de geschtirge Sitzig vom Iiwohnerrat sind dütlich weniger Aaträg gstellt worde, wie au scho, so dass d Sitzig vom Iiwohnerratspräsident Christian Oberholzer um Viertabzehni am Abe het chönne beended werde.
D Finanzkommission (Fiko) het all ihri Aaträg durebrochd, d GLP het druf verzichtet Aaträg z stelle, wil si in de letschte Johr festgstellt het, dass si ned mehrheitsfähig sind, während SP/WettiGrüen diversi Aaträg gstellt het. Zwöi devo sind aagnoh worde. Bim erschte isch es um d Eröffnig vonere noie Kontogruppe für d Luftreinhaltig und de Klimaschutz gange. Während de Aatrag dete 50’000.- Franke iizstelle abglwehnt worde isch, het de Rat mit 25 Ja , 20 Nei und einere Enthaltig bschlosse, 5’000.- Franke für Kommissionsarbet bereit z stelle.
Verbunde mit dem Budgetaatrag vom Gemeindrat isch e drüprozentigi Stüürerhöchig für d Vorfinanzierig vom Oberstuefezentrum gsi. D Vorfinanzierig het de Iiwohenrrat mit 39 Ja-, 6 Nei-Stimme (vo de SVP) und einere Enthaltig gnehmiged. S Budget miteme Stüürfuess vo 98% hend 38 Iiwohnerrät guetgheisse, bi 7 Nei-Stimme (vo de SVP) und einere Enthaltig.
S letschti Wort het aber d Wettiger Bevölkerig, wo am 24. November a de Urne übers Budget und de Stüürfuess wird abstimme!