De Kanton wird z Wettige e kantonali Asylunterkunft eröffne. Sie wird im ehemalige «St. Bernhard» si.
De Kanton Aargau muess im 2024 unter Umständ 3000 oder meh Persone us em Asylberiich unterbringe. Mit Zustimmig vom Gmeindrat, schriibd s Badener Tagblatt, wird de Kanton en Unterkunft z Wettige eröffne. Die kantonali Unterkunft wird im ehemalige Alterszentrum St. Bernhard iigrichted, wo nach em Zügle vom Gässliacker retour uf Nussbaume, leer stoht. Es sell für 230 Persone Platz biete. Ab em 1. Mai selled die erschte Familie iiziehe. De Regierigsrot muess schints noch de formelli Bschluss fasse, aber danach wird de kantonali Sozialdienst s ehemolig St. Bernhard ab em 1. April 2024 miete. D Nutzig wird auf zweiehalb Johr befristet.
In ere erschte Version hend mir en Zämmehang mit em Bundesasylzentrum behauptet, wo de Bund in d Zivilschutzaalag bim Margi-Schuelhuus im Blick het. Beides het aber nüd mitenand z tue und mir entschuldiged ois für die Fehlinformation.