Am Friitig, 25. August 2023 z’Obe am Sibni findet ide Chloschterchile Wettige s’zweiti Konzert
vode neue Reihe «Ostinato Konzerte» statt. De 22-jährig Nachwuchsgiiger Silvan Dezini us
Spreitebach hett letscht Jahr sini eignig Konzertreihe gründet und präsentiert es
villversprechends Programm.
Rappelvoll isch d’Chloschterchile letscht Jahr gsi, wo de Silvan Dezini mit de bekannte «Vier
Jahreszeiten» vom Vivaldi de Startschuss für sini neu Konzertreihe geh hett. «Es isch e
bsundrigi Atmosphäre gsi – d’Chloschterhalbinsle isch eifach einzigartig und d’Freud ade
Musig a so vill Lüüt chönne wiiter z’geh isch wunderbar», erinneret sich de Silvan.
Das Mol staht de grossi Komponist Johann Sebastian Bach im Zentrum vom Programm. De
Silvan Dezini spillt als Solist zwei wunderschöni Giigekonzert vom Bach und zeme mit em
Stargiiger Sebastian Bohren s’Doppelkonzert. De Bohren isch em Silvan Dezini sin langjährige
Mentor und Fründ – wer die beide scho mal zeme gseh und ghört hett, weiss, wie guet sie
harmonieret.
De Dezini und de Bohren spilled au es Konzert für zwei Giige vom Vivaldi und abgrundet wird
s‘Programm mit em bekannte Kanon vom Pachelbel. Begleitet werded die beide Soliste vom
Ostinato Ensemble. De Silvan Dezini hett hochkarätigi Musiker chönne engagiere, vo dene
die meiste scho bim letschte Konzert debii gsi sind.
«S’Ziel vode Ostinato Konzert isch es, schöni und qualitativ hochstehendi klassischi Musig
anes breits Publikum z’bringe und Mensche us allne Altersgruppe z’verbinde», erklärt de
Silvan. En rauschende Applaus und villi glücklichi Gsichter nachem Konzert letscht Jahr hend
zeigt, dass die neu Konzertreihe e villversprechendi kulturelli Erwiiterig für d’Region isch und
dass me sich no uf villi wiiteri Konzert chan freue.
Iitritt frei, Kolläkte
Do en Iidruck vom letschte Ostinato Konzert: https://www.youtube.com/watch?v=KCMQCYsRuJ8