Am Sunntig, 16. Juli 2023, isch d Sabine Bärlocher nach ere churze und schwere Chrankheit verstorbe. D Fa. Obrist T+R AG truured um ihri Chefin.
Ihre 50. Geburi, wo demnächscht gsi wer, het d Sabine Bärlocher nümm chönne erläbe, aber ihres Firmejubiläum «20 Jahre Obrist T+R AG» het si am 3. Februar 2023 no mit de ganze Belegschaft z Noiehof chönne fiire.
Vor vilne Johr het d Sabine in de 3. Generation d Firma, wo ursprünglich z Wettige aasässig isch gsi, vo ihre Eltere, de Lilo und em Bäri Bärlocher-Obrist chönne überneh und het d Firma Obrist T+R AG kontinuierlich usbaued. Mit Witblick het si noii Mitarbeiter gwonne und het für s Unternehme es starchs Entsorgigs- und Recyclingteam ufbaud. Vor 8 Johr isch zudem de Entsorgigsplatz Brings im Turgi übernoh worde.
D Sabine isch au es langjährigs, engagierts Mitglied im Verwaltungsrat vo de RVBW und Vorstandsmitglied vom ASTAG gsi.
Für ihri Mitarbeiter het si immer es offnigs Ohr gha und het sich vil Ziit gnoh für ihri Problem und Aalige. Wo si het chönne het sis Personal unterstützt, au bi Fragestellige userhalb vo de Firma. Ihr isch das wichtig gsi, damit d Wohl und d Zfrideheit vo ihrene Lüt sichergstellt gsi isch.
D Sabine hinterlaht e grossi Lücke und ihri offeni und härzlichi Art werded d Mitarbeitende vo de Fa. Obrist in blibender Erinnerig bhalte. Si wend mit viel Härzbluet, Lideschaft, Energie und Froid de Sabine ihres Läbeswerk witerführe.