Tägi Classic – Es Iishockeyfescht für eusi Region

Wer gern Spannig zur Brootwurscht und em Bier hät, sött unbedingt am Wochenänd is Tägi go.
D Spiiler vo de 2. Mannschaft vo de Argovia Stars, händ sich sletscht Johr öppis bsundrigs usdenkt, well ihrem Team öppis gfällt.

Sie liebend ihre schnelli Sport uf de scharfe Kufe. Aber no me Freud hättends, wenn sie ihre Sport mit Lüüt us de Region chönntet teile. En usglassni Stimmig mit volle Zuschauerräng i ihrem Heimstadion sTägi Wettige loht ihres Herz fasch no feschter schlo als Iishockey selber. Dorum wend sie ihri Passion für de Sport mit ihrne Familie, Fründe und allne Iishockeyfans us de Region teile.
Dezue händ sie 2021 sTägi Classic is Lebe gruefe. Und da Johr spielend sie scho i de zweite Usgab.
Letscht Johr händ sie bim Heimspiel geg de EHC Herrischried stolzi 250 Zuschauer ka. Das isch es
Fescht gsi. Vor allem au, well sie 6:1 gwunne händ.
Wells so viel Spass gmacht hät, ladend sie das Johr wieder i. Damol zum Spiili geg de HC Wohle
Freiamt. DGegner us em Nochberstal versprechend en spannendi und stimmigsstarchi Partie, well
dWohlener wänd dStars iischalt verwütsche und drü wertvolli Pünkt mi Hei nä. Da wend dStars mit
allne erlaubte Mittel verhindere. „Well eusi Pünkt bliebend dehei“, meint de Oliver Egloff, wo selber
bi de Argovia Stars spielt und sTägi Classic organisiert. Das hät en Huufe ztue gä, aber als geborene
Organisator macht ihm da fascht so viel Spass wie sChneble selber.
Au sTägi freut sich uf de Event. De Itritt isch frei. Es git Wurscht vom Grill, Bier vom Fass, würzige
Glühewii und Süesses zum Gniesse. Wer Ziit und Freud am Iishockey hät, isch herzlich iglade.
Türöffnig im Sportzentrum Tägerhard Wettinge isch am 26.November 2022 um 18.00 Uhr und de
Spiilapfiff um 18.30 Uhr.
Und sMotto vom Obe isch: Chom doch au. I eusem schöne Tägi häts Platz für alli. (AH)