Wenn dTäg chürzer werdend, de Nebel sich über sMittelland leit und die erschte Wiihnachtsguetzli d‘Regal vo de Läde füllend, denn fangt für d‘Liebhaber vom Wintersport es bsonderi Ziit a. D‘Keba und s‘Tägi öffnend wieder ihri Türe und laded i zum bitz meh oder bitz weniger elegante Schliiffschuhfahre.
Start Hockeyschuel
Für vieli isch es au de lang erwünschti Start vo de Hockeyschuel Young Bulls. Jewils Mitti Oktober isch es im Tägi Wettige und de Keba Aarau sowit. Um die 90 Chind vo Chindergärtler bis zu de Primarschuel machend sich am Samschtig früh parat, zum bim Sven Furger (Aarau) und Pete Halsey (Wettige) und ihrne Teams, s‘Chneble vo Grund uf zlerne.
Schlittschuheläuferinne vom Iislauf Club Aarau helfend de Neuling bi de erschte Versüech uf em Iis. Hockeytrainer und –spieler vo der Argovia Stars verastaltend Spiili, bauend Parcours und zeigend wie mer en Puck richtig am Gegner verbi und is Goal beförderet. Die werdende Stars händ Spass und fahrend scho wie echti Profis. Zumindescht chleidertechnisch. Denn en ächte Hockeyspieler spielt vo chlii a in voller Montur. Was ned nur cool usgseht, sondern au guet schützt. Da merkend die chline Stars spötischtens, wenn sie serscht mol umkeied. Well mit de dicke Hose und de Schoner tuet da fascht ned weh. So flitzend d‘Afänger scho nach wenige Stunde muetig übers Iis.
Swiss Ice Hockey Day
Das merkend au d‘Stars, wo am 6. November 2022 wegem Swiss Ice Hockey Day i d‘Keba uf Aarau chömend. D‘Spieler us de National League verteilend sich a dem Tag uf 80 Standorte i de Schwiz, zum mit de chline Sterne e Pirateschatzjagd zmache und zchneble. Uf Aarau chömend Spieler us Zug, Basel und Biel, sowie d‘Spielrinne Mayla Uiker und Melanie Lambert vom EHC Zunzgen-Sissach. Aber au grossi Unterstützig gits vo de 1. Liga Spieler us Huusmannschaft Argovia Stars. Es wird ned nur gspiilt, sondern au Autogramm verteilt und Selfies gmacht.
Das isch für d‘Buebe und d‘Meitli us de Hockeyschuel und em Verein e grossi Sach. Stolz zeigend sie, was i ihne steckt, wenn sie de grosse Stars en Puck abluchsend und rasch is Goal inne wüschend. Do stunend au ihri Fründe ned schlecht, wo weg de Aktion „Bring a friend“ Hockeyluft schnuppere chönd. De eint oder die ander häts packt und sie freued sich scho uf de nöchscht Samschtig, wenn sie zum erschte Mol d‘Hockeyschuel in Aarau oder Wettige bsuechend.
Alli Infos zur Hockeyschule Young Bulls unter: www.argoviastars.ch/hockeyschule (AH)