I dem Johr esch ja ALLES anderscht! So esch au de Samichlaus ned zo de Familene cho, sondern d Familie send zom Samichlaus uf Bsuech.
D Organisation vom Samichlaus esch i dem Johr bi de Katholike und de Reformierte komplizierer gsi wi schuscht.
Bi de Kath. Chele sind Chläus mitsamt de Schmutzli a zwoi Treffpünkt gschickt worde und d Familie sind si go bsueche. De einti Ort esch de alti Friedhof gsi und de anderi bem Forhölzi, bem Peter Steimer. De Weg zom Chlaus esch guet usglüchtet gsi med schöne Laterne wo jedes Johr vo Schuelklasse neu gstaltet werded. Bem Chlaus hed es heimeligs Füür brennt wo sech d Gäst au dra händ chönne erwärme. Insgesammt send 11 Samichläus und ca. 30 Schmutzli im Isatz gsi. S Echo esch super usgfalle, de Familiene häds rechtig Freud gmacht mol zom Chlaus uf Bsuech zu go wie umkehrt. Es send ca. 50 Familie, 8 Chendergärte sowie HPS und 2 Schuelklasse bem Chlaus verbii cho.
Di «reformierte» Samichläus sind zwar i de meischte Fäll hei zu de Lüt, hend d Chind aber nie im Huus bsuecht. D Begegnige hend immer dusse und mit em notwendige Abstand stattgfunde, mengisch uf em Gartesitzplatz, aber au uf Parkplätz, uf de Veranda oder im Wald. Scho elleige, dass de Samichlaus überhaupt het chönne cho, isch für alli e grossi Froid gsi.
