Gmäss Bundesratsbeschluss chönd d Restaurants und Bars ab em Mändig em 11te Mai ihre Tor weder öffne!
En chline Rundgang, hüt hed zeigt, dass einigi voll i de Vorbereitig send. So zum Biispiel hämmer de Walter und Andrea Erni vom Sterne chönne beobachte, wie Sie ihri wunderschöni Terrasse vor em Sterne am irechte send. Mit Massband send Sie am Tisch stelle gsi, damit ja de Abstand stimmt, wenn Sie am Donschtig weder de Sterne uf de Chlosterhalbinsle öffnet. Ja, Sie öffnet erst am Donschtig, will s Team alles muess vorbereite und ichaufe!
Echli witterunde esch au s Team vo de Lägerebräu scho flissig gsi und hed meh oder weniger jede zwoiti Tisch müesse entferne. So stoht, je nach Wetter, au ab em Donmschtig de Lägerebiergarte parat mit ca. 60 Sitzplätz. Demit ihr bis denn ned müend verdurschte, büttet d Lägerebräu no immer d Krise-Cheste aah. Informatione dezue findet Ihr be de Lägerebräu Huus-Siite .. : https://laegerebraeu.ch
Au d Nochbere vo de Lägerebräu, d Pizzeria Alpini da Gianni, freud sech uf’s weder Ufmache. Sie händ i de Zwüscheziit veel investiert i Ihre schöni Garte …
Au im Schartefels freued sech d Gastgeber uf’s Eröffne vo de schöne Garteterrasse und möglichst velli Gäst.
s Zys (Rest. und Hotel Zwyssighof) send Tisch au bereit und d Crew instruiert, wie das ab em Mändig denn muess laufe. Im Zys heds de Restaurant-Teil, de Saal und be guetem Wetter au no Terasse. Also heds reichlich Platz für d Gäst.
Gönd go luege und gnüssed d’ Ziit, endlich weder mol uuswärts Euch lo z verwöhne. Bliibed gsund und händs guet..