Es sind für de FC kei gueti Täg gsi, de 30. März und de 6. April 2019. Us de Match gege de FC Olte und de FC Freiebach hets im heimische Stadion Alteburg kei Pünkt geh.
De Match gege Olte am 30. März isch us oisere Sicht de dütlich schlimmer gsi. We de 3.-Platziird dihei gege de Drittletscht tschuttet, set es eigentli e klari Sach si. Zudem het Olte ned guet gschpild. Aber d Wettiger hend es gschaffd no schlächter z tschute und sind nach 75 Minute mit 0:2 hinte gläge. De Aaschlusstreffer zum 1:2 Endstanddurch de Guelor Mukunayi isch dann in de 89. Minute gfalle, het aber de Gsamtiidruck ned chönne verbessere.
Gege Freiebach isch de Start am 6. April dütlich besser glunge. In de 5. Minute isch de FC Wettige durch es Goal vom Labinot Osmani mit 1:0 in Führig gange. De Match het ufeme dütlich höchere spilerische Niveau stattgfunde, aber es het sich immer meh zeiged, dass d Freiebacher besser sind, zumindescht a dem Sunntig. Durch es Selbstgoal in de 21. Minute isch de Usgliichsträffer zum 1:1 gfalle und in de 61. Minute isch mit de beide Träffer zum 1:2 und zum 1:3 dütlich worde, wer de besser Tag verwütscht het. Trotz allne Bemühige het ned emol meh de Aaschlussträffer welle falle.
Mit 0 Pünkt i dene beide Heimatch isch de FC Wettige vom dritte uf de füft Tabelleplatz zruckgfalle.