D Frog vo de Chinderbetroiig isch wider aktuell, wi d Petition vo de Yvonne Hiller und zwöi Vorstöss im Iiwohnerrot zeiged. Aber d Situation isch für Eltere, wo en Betroiigsplatz sueche, eifacher worde.
Noch vor wenige Johr isch d Wartelischte bi de Krippene und Kitas lang gsi. Hüfig hend Eltere versuechd ihri Chind uf e Wartelischte setze z lah, wo no ned uf de Wält si gsi. In de Zwischeziit het sich das gändered, und in vilne Kitas gits no Betroiigsplätz.
Mit em Iitritt in de Chindergarte oder d Schuel wirds dann hüfig e chli schwiriger. Es bruuchd kei Ganztagsbetroiig meh für di Täg, wo beidi Eltere wend oder müend goh schaffe, sondern e Randstundebetroiig, e Halbtagsbetroiig oder en Mittagstisch. Wil de Gmeindrot, so d Yvonne Hiller in ihrem Motionstekscht, unter «bedarfsgrecht» e Warteziit vo bis zu acht Mönet für de gwünscht Platz definiirt, isch es für manchi Eltere en ächti Herusforderig, an dene Tag z schaffe, wo de Arbeitgeber es erwarted. Zudem sind d Aameldig im Tagesstern erscht Mitti Juni möglich, s Schueljahr started aber scho im Auguscht, was d Planig schwirig machd, wenn es de gwünschti Platz ned git.
Nebem Tagesstern nennd d Gmeind uf ihre Website no zwöi anderi Möglichkeite: S Spatzenäscht und Tagesfamiliene. Mir hend noch e witeri gfunde und sind für es Interview dete vorbi. D Kita Noiehof, wo sit em September 2017 im reformiirte Pfarrhuus unterbrochd isch, wohlgmerkt numme en Chatzesprung ewäg vo Wettige. D Kita bietet en Hohl- und Bringservice, so dass si au für Wettiger Schulechind interessant isch, aber lueged selber:
Witeri Informatione zu de Kita finded ihr hiir: Kita Noiehof
