D Iiwohnerrötin Yvonne Hiller het bi de Iiwohnerrotssitzig vom 18. Oktober 2018 zwei Motione zur Chinderbetroiig iigreicht. Zum gliiche Themekomples het si jetzt au e Petition gstarted.
Mit petitio.ch hend AZ-Medie en eifachi Möglichkeit gschaffe, um Petitione in ere Gmeind z lanciire. Au mir vo de Wettiger Nochrichte hend es einisch versuechd, aber ned di vo de AZ vorgschribne 200 Unterstützende gfunde. En Blick in di bisherige Petitione zeiged, dass vo de sächs, wo bisher gstarted worde sind, numme eine s notwendige Quorum erreichd het: di gege de Fluglärm.
De Yvonne Hiller het am 1. Jänner 2019 d Petition «Für e besseri Veribarkeit vo Familie und Bruef z Wettige» gschtartet. Si fordered in ihre Petition e Verbesserig vom Aameldeverfahre. meh Betroiigsplätz, Schüelerlotse und Freiwilligi, wo d Chind begleite, en Iiführig vonere Qualitätsmessig und e zitgmässi Definition vo «bedarfsgerechter Betroiig». Damit gits si de Bevölkerig d Möglichkeit, ihrne beide Vorstöss im Iiwohnerrot meh politischs Gwicht z verleihe. In de 4 Tag, sit d Petition laufd, het si scho 110 Unterstützendi gfunde, bruuchd also no 90 in de verbliibende 27 Täg, damit si vo Petitio als «erfolgriich» gwertet wird.