Bi de Üebig am Mittwoch, 19. September 2019 hets s Pikett 2 vo de Füürwehr zeiged, dass si für en Ernschtfall parat wär. Mit em «Hotel Sonne» het si es spannends Üebigsobjekt gha.
Vili Rettige, vil Schluchmaterial und es speziells Huus mit Baujahr 1831 het zu de Iisatzüebig vom Pikett 2 ghört. 187-jährig isch s Gebäud vom «Hotel Sonne» und ufgrund vom Alter und de Bauwiis öppis schpeziells. Vili Zwischestöck, alti Holzböde und au Gasleitige hets im Huus und es bits sigs wi es Labyrinth, hend mir vo de Wirtin Sandra Rudin erfahre. Also en ächti Herusforderig für d Füürwehr und es dankbars Üebigsobjekt. Im «Falle eines Falles» isch nämli Ortskenntnis en grosse Vorteil. Was brönnd bsunders guet (i dem Fall nebe de Holzböde sicher au s Pneulager vo de «Autoteile»), gits Wertkonzentratione, wo sind d Hotelzimmer (also muetmasslich Lüt, wo müend gretted werde) und no vil meh. Verbunde mit de Hoffnig, dass es nie zumene Ernschtfall chunnd, het d Wirtin de Füürwehr für ihri tolli Arbet danked und mir schlüssed ois dem gärn aa.
