Am Donnschtig, 21. Juni 2018 esch di nächscht Sitzig vom Iiwohnerrot. S Traktandum 4 dörft debii veel Diskussionsstoff geh, denn d Finanzkommission (Fiko) esch für d Rückwisig vo de Kreditabrechnig über 43’800.- Franke für «Little Wettige» bi de Badefahrt.
Mir müend echli go ushole, um d Kreditabrechnig, wo för de 21. Juni traktandiirt esch, chönne iizordne, müend aber au echli spekuliire, wil d Gründ für d Rückwisig (no) nöd bekannt sind. Aber fanged mer mol vore aa:
Bi de Badefahrt im Auguscht 2017 händ d ChropfChrötte s Theaterstück Schrottbodealp ufgführt und en Gastrobetriib uf d Bei gstellt. Au anderi Wettiger Verein händ sich engagiirt und Schichte für de Gastrobetriib ufbote.
D Gmeind esch für en Zuestupf aagfröged worde und so hed de Gmeindrot in de Iiwohnerrotssitzig vom 14. Dezember 2016 de Aatrag gstellt, dass d Chropfchrötte für d Baute vom Gaschtroteil e Defizitgarantii vo 25’000.- Franke söttet übercho. Zudem esch en Unterstützig vo 30’000.- Franke für Fäschtplakete vo de unterstützende Persone, drü Vorpremiere inkl. Ässe für je 200 Lüt und für Biiträg an d Vereine beaatrait worde. Wi me us em Protokoll vo dere Iiwohnerrotssitzig cha entneh, isch d Fiko scho damals vo dere Vorlag nöd eso begeischteret gsi. Es esch weniger um d Unterstützig vo «Little Wettige» als solches gange, wie um Tatsach, dass de Gmeindrat so churz nach de Budgetsitzig mit ehre veele, teilwiis empfindliche Sparbeschlüss, miteme settige Kreditaatrag chunnd. D Fiko het deshalb damals de Aatrag gstellt, das Gäld nöd in Form vomene Kredit, sondern us em laufende Budget, konkret us dem vo de Standortförderig z neh. D Fiko isch debii aber uf wenig Ghör gstosse. Numme d Fraktion SVP und de Michael Merkli vo de BDP het lut Fraktionsvote de Fiko-Aatrag unterstützt. Bi de Abstimmig sind 31 Iiwohnerröt em Gmeindrot gfolged und 14 de Fiko.
Us em Traktandebricht für d Sitzig vom 21. Juni 2018 esch z entneh, dass de Gmeindrot e Kreditabrechnig in Höchi vo 43’800.- Franke wot gnehmiged ha. Uffällig isch, dass d Defizitgarantii nöd bruuchd worde isch und demit de Kreditrahme vo 30’000.- Franke um 13’800.- Franke überzoge worde isch. Me het aber de Iidruck, dass d Vorlag das möglichscht versuecht z verschleiere. Von ere Kreditüberschritig esch nämli nöd d Red, sondern de Gmeindrot rächnet mit em Gsamtkredit vo 55’000.- Franke. Demit wird e Kreditunterschritig vo über 10’000.- Franke suggeriirt. Aber ob das d Fiko dazu brochd het, e Rückwisig z beaatrage oder ob es au oder numme anderi Gründ sind, das werded mir bi de Iiwohnerrotssitzig am 21. Juni erfahre.
