De Baubeginn fürs Chloschterbrüel isch emol für de Sommer 2017 planed gsi. Nach ere Verschiebig ufs Früehjohr 2019 hoffed die Verantwortliche jetzt, dass es im 2021 cha losgoh.
Grossi Bauprojäkt bruuched hüfig e langi Vorlaufziit, bis si chönnd umgsetzt werde, bsunders wenn es Iisproche git. So gohts au de Gnosseschaft «Lägere Wohne», wi s Badener Tagblatt hüt mitteild. De ursprünglich Start fürs 100-Millione-Bauprojäkt im Chloschterbrüel isch scho öfter verschobe worde. In de zwischeziit schint en Start für di erscht Etappe erscht im 2021 realistisch, also öppe 4 Johr spöter, wi ursprünglich planed.
D Knacknuss isch immer no de Vercher. Planed isch d Erschlüssig vo de Tiifgarage über de nördlich Teil vo de Gruebestross. Scho in de «Chloschterbrüel Zitig» vom Mai 2017 heissts dazu, dass betroffeni Nachbare d Sorge hätted, dass de Vercher über de südlich Teil vo de Gruebestross und d Berninastross laufd. Gege d Erschlüssig über d Gruebestross isch, so schriibd s Badener Tagblatt, immer no e Beschwerde hängig, über di de Regiirigsrot in de nächschte Mönet wird entscheide. Wenn de Kantoin grüens Liecht git, wot d Gnosseschaft s Bauiigsuech iireiche. D Abstimmig über de Baukredit für di noi Sidlig wird vermuetlech erscht im 2019 de Mitglider vo de Gnosseschaft vorglegd.
Uf jede Fall isch planed, dass di noi Überbauig in zwei Etappe realisiird wird, so dass langjährigi Mieter, wo im Chloschterbrüel wend bliibe, grad us alte in noii Wohnige chönnd zügle. Da sig für d «Lägere Wohne» zwar e tüüri Sach, aber es chönnti uf di Art uf Kündigunge verzichtet werde. Di Mieter, wo no nöd eso lang in de Sidlig läbed, hend nämli numme zitlich befrischteti Verträg.
