Immer wider chunnd in de Region Bade s Thema Fusion uf de Tisch. Wettige gilt doderbi ehnder als Brems-Chlotz. Di noi Städtestatistik zeiged, dass es dafür gueti Gründ chönnd geh.
Gmeindsfusione sind es emotionals Thema, au do bi ois. D Diskussion um es «Mail an alle», vo dem s Badener Tagblatt am 6. April 2018 brichted het, zeiged das exemplarisch. D Angscht, di eiged Identität, vilicht aber au an Iifluss z verlüre, schürd Ängscht bi manche Iiwohner, Verei und Parteie. Umschtritte isch aber au, welli Gmeindgröss di optimal isch. Grad e Fusion in de Region Bade chönnd – je nach Gmeinde, wo mitmached – zu ere Grossstadt mit wit meh wi 100’000 Iiwohner führe.
Di noi Städtestatistik zeiged aber, dass d Usgabe pro Iiwohner in Städt mit 20’000 bis 49’999 Iiwohner dütlich tüüfer sind, wi in grössere Städt. Uf de andere Site sind aber au d Iinahme dütlich tüüfer. D Frog bliibd also: Was isch di optimal Gröss von ere Gmeind? Ois würd interessiire, wi ihr das gsehnd und froied ois uf oiri Reaktione uf Facebook und Twitter 🙂
