Dritti Niderlag im dritte Match für Rotwiis

Hüt het Wettige sin dritte und letschte Match im Pool A verlore. Mit ere 4-3-Niderlag gege de Turniirfavorit Köln het Rotwiis aber zeiged, was im Team steckt.
Wo de Match in de guet bsuechte Sporthalle vom Tägi um Viirtelvoreis aagfange het, hend d Kölner schnell zeiged, wer Herr im Huus isch. Mit Goal in de 3., 11. und 16. Minute hend di Rot-Wiise us Köln de Match klar dominiirt. Durch en Penalty isch de Wettiger aber kurz vor de Pause de Aaschlusstreffer zum 3-1 glunge.
Nach de Pause isch schnell klar worde, dass der Aaschlusstreffer Rotwiis Wettige en Schub geh het. Si hend versuecht de Match in de Griff z übercho und Druck füre z mache, was aber immer wider an de guet und konzentriirt spilende Kölner gschiteret isch. Aber au wo Köln in de 32. Minute durch en Penalty de Spilstand uf 4-1 erhöht het, hend d Wettiger nöd ufgeh. In de 37. und de 39. Minute hend d Manner vom Trainer Peter Fischbach jewils durch e kurzi Egge es Goal chönne schüsse. Au wenn oisi Rotwiise alles probiirt hend, um in de letschte Minute zumene Goal z cho, het Wettige sich mit ere 4-3-Niderlag müesse abfinde.

S Team het jetzt no zwei Match. Hüt, Samschtig, 17. Februar 2018 spileds um 16.30 Uhr gege de SV Arminen us Öschtriich und morn, Sunntig, um 10.00 Uhr gege de SPV Complutense us Spanie.