Nochruef uf de Lothar Hess

Am Tsischitg, 23. Januar 2018 isch de Alt-Gmeindamme Lothar Hess z Wettige gschtorbe. Langi 32 Johr isch er Gmeindamme gsi und het Wettige prägd wi kein andere.
Wo de Lothar Hess als junge Maa sini Stell als Grichtsschriiber z Bade aaträte het und so uf Wettige cho isch, het er sicher nöd mit grächned, dass er einisch so vil Spure in oisere Gmeind wird hinterlah und wo er im 1961i Gmeindamme worde isch, het sicher au kaum öppe damit grächnet, dass er das Amt 32 Johr lang usüebe würdi.
In sinere Amtsziit isch de Iiwohnerrot gründ worde, d Maregeläckerschuelhüser 1 und 2 sind baud worde, d Bezirkschule isch erwitered worde und d Gmeind het verschidnigi Landfläche kaufd, wo strategisch wichtig si gsi. Au s Tägi wär ohne ihn wohl nie baud worde und au d Noibaute für de Werkhof und für d Füürwehr traged sini Handschrift. Au s Chloschter isch ihm immer sehr am Härze gläge und zum 750-jährige Jubiläum het er mit dafür gsorged, dass es Kontakt zwüsche Wettige und de Territorialabtei Wettingen-Mehrerau git, wo sither durch de «Verein vo de Fründe vom Chloschter Wettige» inschtitutionalisiirt isch. Nebem sim Engagement für d Iiwohner- und für d Ortsbürgergmeind, vo beidne isch er im 1994 Ehrebürger, het er au d Gschick vom Kanton Aargau mitbstimmt. 26 Johr lang isch er für d CVP Mitgliid vom Grosse Rot gsi.

D Abdankig isch am Fritig, 2. Februar um Ölfi am Vormittag in de Chloschterchile.