Wettiger Futsaler schaffed in eme furiose Match es 5:5

Am 13. Januar hend AFM Futsal Maniacs gege Minerva mit 7:2 e dütlichi Niderlag müesse iistecke. Am letschte Samschtig, 27. Januar 2018 hend si di Niderlage welle vergässe mache. Mit ere unvergässliche Schlussphase hend si das gschaffd, wenn es au numme ein Punkt geh het.
Di 1. Halbziit isch eigentlich schnell zammegfasst: Minerva het vo Aafang a klar gmachd, dass si den Match in de Sporthalle im Tägi wend gwünne. Scho in de 2. Minute isch s erschti Tor für d Uswärtsmannschaft gfalle. Erscht in de 12. Minute isch de Maniacs de Usgliich glunge. D Futsaler us Bärn hend d Wettiger immer wider früh attakiirt und mit Pressing stark unter Druck gsetzt, was sich in de 15. und de 16. Minute mit em 1:2 und em 1:3 uszahlt het. Das Ergäbnis het bis zu de Pause Bestand gha. De ei oder ander Zueschauer het sich dann in de Pause sorge gmachd, dass de Match ähnlich dütlich usgeh chönnd, wi der z Bärn. Das es anderscht cho isch, het au mit Glück z due gha, aber mit em «Glück de Tüchtigen». In de 23. Minute isch de Aaschlusstreffer zum 2:3 gfalle und wo in de 29. Minute s 3:3 gfalle isch, hend d Spiler und Fans vo de Maniacs uf en Siig chönne hoffe, aber scho e Minute spöter isch s 3:4 gfalle. Ufgeh hend d Maniacs gliichwohl nöd und au nöd, wo es zwöi Minute vor Schluss immer no 3:4 gheisse het. Wenn d Maniacs in Ballbsitz gsi sind, isch de Goali use und de Alessandro Facchinetti het inem egrüene Goalietrikot im Sturm gschpilt. Dass di Taktik nöd ganz ohni Risiko isch, hend d Wettiger Futsal-Fans scho in de beide vorherige Heimmatch im Tägi chönne erläbe, wo Friburg mit 5:2 und Züri mit 12:3 besigt worde isch, au, wil di Mannschafte zum Schluss ohni Goali gspilt hend. Für d Maniacs hets au schlächt usgseh, wo Minerva in de 39. Minute de Ball ins leere Goal gschosse hend und es 3:5 gheisse het. Di letscht Minute – in dere d Uhr immer wider het müesse gstoppt – isch zumene ächte Spektakel worde. Zerscht isch es im Alessandro Facchinetti glunge, en Schuss wo de Goali von Minerva zwar abgwehrt, aber nöd hebe het chönne, zum 4:5 z verwandle und dann het de Goali kurz vor Schluss en Spiler vo de Maniacs bimene Abwehrversuech am Kopf troffe. Bim Penaltypfiff isch d Uhr bi 00:02 stah blibe. Es isch klat gso, dass en verwandelte Penalty en Punkt würd rette, en verschossene e Niderlag bedütet. D Verwantwortig het de Christopher Krause übernoh, wo scho di erschte beide Goal für d Futsal Maniacs gschosse gha het. Souverän het er de Penalty chönne verwandle, so dass der spannend Match mit dere dramatische Schlussphase und em 5:5 mit ere grächte Punkteteilig gendet het.

Hiir chönnd ihr di dramatisch Schlussphase aaluege: