Am Mittwoch, 25. September 2019 het d Gmeind Wettige d Seniorinne und Seniore zueme Herbschtfäscht iiglade. 600 sind de Iiladig gfolgd. Musik, Kultur und Kulinarik sind uf em Programm gschtande.
De «Seniorenamittag» het miteme noie Konzept schints d Bsuecherinne und Bsuecher überzügd. Vili fröhlichi Gsichter hend de Gmeindamme Roland Kuster und de zueständig Gmeindrot Philippe Rey i de Sporthalle im Tägerhard dörfe begrüesse, schriibd d Gmeind inere Mediemitteilig. De Grossadrang, wo dank vorgängiger Aameldig ned überraschend cho isch, isch in Sache Verkehr durch de Werkhof gregled worde. Di Lernende vo de Gmeind sind iigschpanned gsi und au de Samariterverei het tatkräftig mitgholfe.
Im Foyer hets en Usstellig mit Föteli uf em Gmeindarchiv gha und nach de Eröffnig durch de Philippe Rey het de Ruedi Velhagen zäme mit em Meischterflorischt Urs Iten s Projäkt «Blumen für die Kunst» vorgschtelld. Nach de Kalte Platte und Wettiger Wy het de Gmeindamme d Gäscht begrüesst und in sinere Aasproch au Themene wi d Stüürerhöchig und di noi ALTSTADT vo de St. Bernhard AG aagschproche. Miteme Chrüzworträtsel-Wettbewerb un d Tanz isch de Aalass abgrundet worde.
S Fazit vom Roland Kuster isch gsi: «». Und de Philippe Rey het d Lüt mit dene Wort verabschiided: «Gönd hei und sind nätt zunenand».