Ufs Johresänd gits drü Rücktritt us em Iiwohnerrot

Bi de letschte Sitzig vom Iiwohnerrot im 2018, am Donnschtig, 13. Dezember, isch de Rücktritt vo drü Iiwohnerröt bekannt geh worde.  D Nochfolger werded im Januar 2019 in  Pflicht gnoh und damit zu Iiwohnerröt.
Geschter sind vom Iiwohnerrotspräsident Hansjörg Huser drü Rücktritt bekannt geh worde. Es sind de Toni Schneider (FDP), de Jürg Rüfenacht und de Reto Huber (beidi CVP), wo ihri politisch Karriere im Rot beendet. Am 24. Januar 2019 werded dann de Damien Campino für d FDP und de Simon Bürgler und d Marija Hess (beidi CVP) in Pflicht gnoh.
Damit hets nach em Tod vom Hermann Steiner, für den de Roger Scherer (SVP) nochegrütscht isch und de Rücktritt vo de Celina Feri, de Kristin Lamprecht (beidi SP) und em Daniel Frautschi (SVP), für di d Katharina Urfer, de Heinrich Müller und de Martin Fricker noi in de Rat cho sind, nach em erschte Johr vo de Wahlperiode scho sibe Wächsel.