Di Asiatisch Hornisse (Vespa velutina nigrithorax) stammt ursprünglich us Südoschtasie und isch vermuetlich durch de internationali Warehandel nach Europa igschleppt wurde. Im Johr 2004 het sie sich über Frankriich usbreitet. 2017 isch si zum erschte Mol i de Schwiiz im Jura gseh worde.
Jetz isch es sowiit: In Wettige sind bis hüt foif Einzelexemplar gsichtet und beschtätigt wurde. Sekundärneschter, das sind die, wo si i dere Johresziit mit Vorliebi hoch obe i de Bäum bouet, hämmer bis jetzt in Wettige no keis entdeckt, aber in Bade (4), Neuehof (mind. 1) und Spreitebach (1) gfunde.
(Bild: Alti Zürcherstross in Neuehof uf 40 Meter Höchi – mittlerwiile entfernt – Quelle Stefan Forrer, Neuenhof)
D’Usbreitig vom dem Tier het ökologischi, ökonomischi und gsundheitlichi Uswürkige.
Die invasivi Art bedroht ned nur d’Honigbiene, wo durch ihri Lebenswiis als Volk es liechts Opfer und e ergiebige Nahrigsquelle isch. Si jagt au anderi Bienearte und Insektepopulatione. Eis Volk chan über 11 Kilo Insekte pro Johr fresse. Die Hornisse isch sehr apassigsfähig und chan sich uf lokali Nahrigsquelle ischtelle wie zum Bischpil Trube und Obscht. Me befürchtet en Ifluss uf regionali Ökosyschtem. Si isch mindischtens 1.7cm lang und het en vorwiegend schwärzlich gefärbte Bruschtteil und gäli Bei-Endi.
Me isch bestrebt, die Invasore izdämme und d’Usbreitig z’verzögere, was eus meh Ziit ge chan, geeigneti Massnahme z’entwickle. Aber es isch klar, dass sich das Insekt usbreite wird, nur s’Tempo und s’Usmass sind ungwüss.
Was ned mache: Es wird defo abgrote, zur Bekämpfig Falle ufzstelle, denn die sind zwenig selektiv und fanged au vieli iheimischi Arte. Am effektivschte isch d’Entfernig vo dene Näschter. Mached si das aber ned selber – dodeför sind Spezialischte erforderlich. Das isch d’Ufgab vom Kanton.
Mäldig bi Verdacht: Meldet si verdächtigi Hornisse oder Näschter mit Foti oder Video uf de Meldeplattform vom Kanton: www.ag.ch/asiatischehornisse. Deht findet si no meh interessanti Informatione zu dem Tier.
Gastbitrag vom Robi Kreimel, Imker und Mitglied im Bienlizüchterverein vom Bezirk Bade.