Über d Pfingste, 7. bis 9. Juni, finded z Wettige, uf de Wiese hinde am Tägi Rechtig Würelos, s grösste Zeltlager vo de Schwiiz statt. Das heisst Jublasurium, und esch s nationale Pfingstlager vo Jungwacht und Blauring.
Bem Jublasurium chömed über 10’000 Jugendlichi us de ganze Schwiiz uf Wettige. Das send 235 lokali «Schare» wo sech aagmelded händ. Sie werded gmeinsam es eimaligs Programm erlebe: Sport i de Natur, am Lagerfüür singe, abentürlichi Gländespiel und Gmeinschaft erlebe stönd im Zentrum. Dank de Grössi vo dem Aalass chönd die Teilnehmende eimaligi Aktivitäte usprobiere. Die Möglichkeit bietet sech nume selte. De letschti Aalass in dere Grössi vo JuBla esch im 2016ni gsi.
Demit sowas cha stattfinde heds veel Vorarbeit bruucht. So send ca. 110 ehereamtlichi jungi Erwachseni sit rund 4 Johr med de Vorbereitige beschäftiged. Zusätzlich chömed de nomol rund 700 Helfendi dezue wo wärend de Durchfüehrig und bem drüwöchige Uf- und Abbau unterstützig gänd. Das ged denn en Ziitufwand vo ca. 64’780 Stond ehreamtlichi Arbeit.
S Unterstützigskomitee bestood us 19 Persönlichkeite us Politik, Wirtschaft, Sport, Chile und Gsellschaft. Sie setzed so es starks Zeiche für d Wert vo de JuBla und au für Engagement vo de hunderte Ehreamtliche wo das Jublasurium ermögliched.
So esch au de neui Bundesrat, de Martin Pfister, es Mitglied und werd im Lager am 7. Juni en persöndlich Bsuech abstatte.
Dezue es Zitat vom Bundesrat Martin Pfister: «Jugendorganisatione wie Jungwacht und Blauring zeiged iidrücklich, wie wertvoll e engagierti Chender- und Jugendarbeit für eusi Gsellschaft esch. Zmits i de Natur übernehmed jungi Mensche Verantwortig und lerned, i de Gmeinschaft ufenand z achte – settig Erfahrige präged oft es Lebe lang»
Meh Informatione zu dem Lager findet Ihr uf de folgende Huus-Sitte:https://www.jublasurium.ch/
oder via Instagram: https://www.instagram.com/jublasurium/
>Sowit eus bekannt esch, werdet nach wie vor „Helfendi-Händ“ gsuecht .. Info uf de Huus-Sitte