Vom Fritig, 21. bis Sonntig, 23. Februar 2025 esch i de Sporthalle im Tägi de EuroHockey Indoor Club Cup Men 2025 über d Bühni gange. Wi immer, vo Rot Wiiss Wettige tadellso organisiert!
S Turnier, wo am letschte Wochenänd im Tägi stattgfunde het, esch immer sehr guet bsuecht worde. Gege di 1’000 Persone send pro Tag zo dene Spiel cho. D Mannschafte händ nie vor leere Räng müesse spiele. So sind z.B. am Fritig am Morge und am Nomitag je 350 Schüeler is Tägi cho. Dementsprechend esch d Stimmig au be de Gastmannschafte sehr guet gsi.
Au die Offizielle vo EuroHockey händ sich sehr positiv zom sehr glungene Turnier güsseret. S OK, rund um de Fredi Wälti, hed sech nomol gsteigered und med dem Turnier en neue Standard gsetzt… e Usag vo de 1. Mannschfft unterstriichd das:
«Ja, es schiend ned numme so, es isch genau eso de Fall gsi. Es esch unglaublich z gseh, wie vili Freiwilligi, Fründ, Familie und Sponsoren ihre grosse Aateil an dem erfolgriiche Event händ.
Vor sonere perfekte Kulisse spiele z chönne, bruuchd en enormi Vorbereitig. Me hed geseh, dass jede mit Herzbluet debi esch gsi, zum das alles ermögliche. Ois als Herre 1 esch das sehr bewusst und mir bedanken eus vo Härze be de gsamten Rotwiss-Familie!» (Quelle: SwissHockey)
Wer am Wochenänd im Tägi gsi esch, hed gseh, was alles möglich esch i de über 30-jährige Sporthalle am Ortsrand! Vor allem all die, wo i dere Halle Sport mached, würdet sech so es Liecht und so en Ton wünsche. Für das Turnier hed Megatron Verastaltigtechnik öppe 10 Tonne Material annegschafft. Au die verantwortliche vom Tägi händ Hand bote und s beschte geh. Im Vorfeld send so d Duschaalage und d Santitärumgebig saniert worde. Au d Belüchtig esch revidiert worde uf das Turnier.
Und ja: Gwunne hed das Turnier de Verein Royal Leopold us Belgie. Si hend im Final gege Mannheim im Penaltyschüsse 2 Goal meh gmachd. D Mannschaft vom Gastgeber Rot Wiiss Wettige hed de Klasseerhalt gschafft und hed s Turnier uf em 5. Platz beendet.
unter folgendem Link findet Ihr Impressione vo dem Turnier https://www.waelti-media.ch/neuste-bilder-1