Bankräuber muess 7 Johr ins Gfängnis

En Italiener het im Juni 2017 d UBS-Filiale überfalle. Dafür muess er sibe Johr ins Gfängnis und wird zuesätzlich miteme Landerverwiis uf 15 Johr bestroft.
Vom Bezirksgricht z Bade isch de Massimiliano P. hüt, 11. April 2018 zuere Freiheitsstrof vo sibe Johr verurteilt worde und er dörf 15 Johr nüm i d Schwiiz iireise. Grund dafür isch nebem Raub-Überfall uf d UBS-Filiale z Wettige en Überfall uf e Tankschtell z Schpreitebach. Au wege andere Vorwürf, wi grobi Verkehrsverlätzige, isch er verurteilt worde, wi s Badener Tagblatt mitteild. Sini Strof muess er in de Juschtizvollzugsaastalt Länzbrg absitze. Scho sit sinere Inhaftiirig im Oktober 2017, wo er uf de A3 bi Meeli fäschtgmoh worde isch, sitzt er im vorzitige Strofvollzug im Untersuechigsgfängnis z Aarau.
De Grichtspräsident Daniel Peyer het bi de Verhandlig betont, dass de Bschuldigte nöd ufgrund vo Bewiis, sondern uf Grund vo Indizie verurtleit worde isch, aber will es öppe es Duzend si gsi, gäbs kei Zwiifel, dass de Massimiliano P. schuldig sig.