S noi Tägi öffned am 6. Juni

Gmäss Bschluss vom Bundesrat dörfed d Schwimmbäder am 6. Juni wider starte. Au s Tägi öffned a dem Tag. Selbstverständlich mit Schutzkonzept und Distanzregle.

Vili Schwiizerinne und Schwiizer werded d Sommerferie i de Schwiiz verbringe. Us dem Grund erwarted d Badis vili Bsuecher. Im Freizit-, Sport- und Eventzentrum Tägi, wo am 6. Juni nebem Gartenbad au s frisch sanierti Hallebad, d Sauna, d Minigolfaalage und de noi Eventsaal öffned, het me sich vil Gedanke über d Schutzmassnahme gmachd.

So hets Tägi zämme mit de Agentur Scharlachrot es «Social-Distance Badtuech» im Aagebot. Um di persönlich Privatsphäre z markiere und dodemit d Abstandsregel iizhalte, isch es vil grösser wi es normals Badtüechli. Mit 3×3 Meter isch es öppe föif Mol so gross. Di gröscht Useforderig sig gsi, en Lieferant z finde, wo so es grosses Badtuech so churzfristig und in usreichender Mengi und zueme aagmessene Priis herzstelle. S Badtuech cha me über den Link uf de Homepage vom Tägi bstelle: www.taegi.ch/socialdistance. E Bstellig cha me aber au ab em 6. Juni am Empfang vom Tägi ufgeh. D Aazahl Tüechli isch limitiert. De Verchauf isch chostedeckend und ned gewinnorientiert. De Verchaufsprois ligd bi 55.- Franke inkl. MWST. Vom Verchaufserlös werded 10% an d Glückskette gspended, um Einzelpersone und Familiene us de Schwiiz z hälfe, wo unter de gsundheitliche, soziale oder wirtschaftliche Uswirkige vom Virus lided.