De Start vo de Sunntigsgottesdienscht, wo uf de 14. Juni planed sich gsi, wird vo de Reformierte Chile Wettige-Noiehof e Woche füre gschobe. Grund isch de Wegfall vo de Empfehlig, dass d Risikogruppe dihei sette bliibe.
«We mir öppis glernt hend i dere Krise, dann bsunders, dass morn scho wider alles anderscht cha si», meint d Margrit Wahrstätter, Präsidenti vo de Chilepfläg vo de reformierte Chile. Sit em März, wo de Krisenstab Corona iigsetzt worde isch, hend Entscheide wege de Entwicklig uf Bundesebeni immer wieder müesse aapassd werde. «Mengisch isch es wi es ‘Rückzugsgfecht’ gsi» meint de Pfarrer Lutz Fischer-Lamprecht. Ihm sind bsunders d Diskussione um d Konfirmatione oder de Informationsabe über d Immobilienstrategie vo de Chilepfläg präsent, bi dene me zerscht entschied het, bim Apéro uf de Zopf z verzichte, dann de Apéro ganz gestriche het und zum Schluss d Aaläss ganz het müesse verschiebe.
Bi de Lockerige vo de Massnahme gohts jetzt öppe gliich. Bim Religionsunterricht hets escht gheisse, er chönni am 11. Mai zämme mit de Schuel wider starte, wo dann alles organisiert gsi isch, isch d Meldig cho, dass er no ned dörf stattfinde und wo dann d Absagen erfolgd si gsi, hätte de Kanton doch wider s Okay geh. De Krisenstab vo de Chilegmeind het dann bschlosse, s Hüst und Hot ned mitzmache und erscht am 8. Juni wieder z starte. «In de instabile und verunsichernde Situation isch es ois es Aalige gsi, wenigschtens es Stück wit verlässlich z si», so d Margrit Wahrstätter.
Anderscht isch es jetzt bi de Sunntigsgottesdienscht. De Entschluss, statt an Pfingschte erst am 14. Juni z starte, wi er au in der Limmatwelle und de Bilag zum «reformiert.» publiziert isch, isch nach de gestrige Bschlüss vom Bundesrot überholt. Der Pfingschtgottesdienst finded zwar no online (wird am 31. Mai um 9.30 Uhr ufgschalte) statt, de Gottesdienst vom 7. Juni um 9.30 Uhr in de reformierte Chile bilded aber noi de «Startschuss» fürs kirchlichi Läbe. Es wird aber noch dütlich iigschränkt blibe, wil d 2-Meter-Abstandsregle vieli Veranstaltigd unmöglich macht. Es wird au bi de Absag vo de Veraastaltige blibe, wo scho geschtriche sind, wie d Chilegmeindsversammlig, s Sommerlager und d Seniorenferien. Stattfinde wird aber s Konzert vom 21. Juni.