Für s Spiler und Fans vom FC Wettige ischs di vilicht gröschti Hiobsbotschaft sit em 1993 gsi: De Vorstand het de freiwillig Rückzug in di 2. Liga regional bekannt geh. Ineme offnige Brief nimmt di 1. Mannschaft Stellig zu dem Entscheid.
Me gschpürt d Enttüschig und au d Wuet, we me de offnig Brief vom Fanionteam an d Vorstandsmitglider vom FC liest. Si beschriibed d Entwiklig vo de im Sommer 2019 noi formierte Mannschaft, wo mit Visione und Ambitione d Vorbereitig für d Saison 2019/20 in Aagriff gnoh het. Kei überrisseni Löhn, drümol i de Woche Training und au am Samschtig no einisch e Trainigseinheit. S Zil isch de Ufstieg in di 1. Liga gsi und mit em 2. Tabelleplatz nach de Vorrunde, mit numme eim Punkt Rückstand uf de Leader, isch me dem Zil nöch gsi.
Über d Rückzug, so schriebed d Spiler, sind si i dem Moment informiert worde, wo de Bricht i de AZ publiziert worde isch, am Fritig um 7i am Abe. Ohni Chance, e gmeinsami Lösig z finde. Und das isch dann au scho de Hauptkritikpunkt! Warum het de Vorstand ned d Spieler mit ins Boot gno und e gmeinsami Lösig gsuechd? Warum keis Crowdfundig, kei witeri Unterstützig für de Verein sueche? Mit dem Entscheid rolled Chöpf, so stoht sim Brief, Chöpf vo faire, ehrliche, loyale und ambitioniert Spiler, wo für ihres Zil vil Zit gopfered und uf finanzielle Leischtige verzichted hend.
Iidringlich bitted s Team de Vorstand, uf de Entscheid zruck z cho und mit de Spiler e gmeinsami Lösig z finde. En Rückzug uf de 2. Liga interregional sig hinterher immer no mögli, we me kei anderi Lösig find.