Ohni e klari Stellignahm vom Bundesrat cha d «Atmosphäre» ned abgsaid werde. Dass si ned wird stattfinde, isch aber allne klar.
D Formulierig vo de gschtrige Mitteilig vom OK zum grosse Jubiläumsfäscht «Atmosphäre» zeiged, wi schwirig d Situation esch, i dem s OK steckt. S OK sig eistimmig der Meinig, dass nach em hütige Wissenstand zu Covid-19 und de Entwicklig i de Schwiiz en settige Grossaalass ned Mitti August cha stattfinde. Zum eine sigs us gsundheitliche Sicht ned sinnvoll, 250’000 Mönsche während 10 Täg uf so engem Ruum zämme z ha, zum andere zwiifled d Organisatore dra, dass inere so schwirige Ziit e gueti Fäschtstimmig chönnd ufcho. Us denen Gründ erwartet s OK, dass si Fäscht werde absäge und empfehled allne Beteiligte, d Vorbereitige ufs Fäscht iizstelle.
Uf de erschti Blick wundered me sich vilicht, dass s Fäscht ned eifach abgsaid wird. Aber au do drüber schriibd s OK öppis in de Mitteilig. Ohni es Verbot vom Bund bestoht d Gfahr, dass d Choschte so fäscht us em Rueder laufed, dass d Forderige di finanzielle Möglichkeite bi witem würded überstiige. S OK wird us dem Grund en Entscheid vom Bundesrat abwarte, bevor en endgültige Entscheid troffe wird.