Esch es eine vo de gröschte Politskandal im Aargau oder e logisch Folg vo aggressive Posts? De Fall vom Wettiger Arzt, wo am Karsamschtig verhafted worde esch, blibt undurchsichtig.
De unstrittig Teil vo de Verhaftig vom T.B. esch schnell verzälld: Am Karsamschtig, 11. April 2020 am Obig esch en 58-jährige Schwiizer i sinere Praxis a de Etzelmatt verhafted worde. Wegem Verdacht, er chönnti bewaffned si, esch d Verhaftig durch Polizischte in Vollmontur vorgnoh worde. Klar esch i de Zwüscheziit, dass de Kardiolog ned bewaffnet gsi esch, was d Frag nach de Verhältnismässigkeit ufwirft.
Au offe schint z si, was am Vorwurf vo Drohige gege Familiemitglieder und Behörde dra esch. S Badener Tagblatt zitiert en Post vo de Plattform «Vimentis», wo de Arzt in Bezug uf d Massnahme gege s Coronavirus folgendes gschrebe hed: «Armee, Polizei, Feuerwehr, schaut sofort wie es Euren Regierungen und den Anstalten der Massenmedien geht und sonst, liebe Bürger, raus, Waffe laden und helfen wir Ihnen!» Do werd die zu erwartendi Grichtsverhandlig zeige, ob der Post juristisch als Drohig z düten esch. Vo de Familiemitglider hät sich bisher niemed öffentlich güssered, so dass es im Dunkle blibt, wem mit was droht worde esch.
Schweri Vorwürf erhebt d Wältwoche gege de Landamma Markus Dieth. Er hätti de Uftrag zur Verhaftig geh. Gegenüber im Badener Tagblatt bezeichned de Dieth di Aaschuldigung als falsch. In sinere Funktion als Landamme hed er vonere Drittperson e Meldig uf Selbst- oder Drittgfährdig becho, wo er hät müesse ernscht neh. «Dies veranlasste mich, die Strafverfolgungsbehörden zu kontaktieren und ihnen die Telefonnummer des Informanten mitzuteilen, damit sie sich selber ein Bild über diese Meldung machen können.», zitiert ihn s Badener Tagblatt. Dodemit, so d Zitig witer, hed er sini Meldepflicht erfüllt, wo vorschriibd, dass Kantonsmitarbeiter Verbräche und schweri Vergehe, vo dene sie in amtlicher Funktion Kenntnis übechömmed, de Strafverfolgigsbehörde müend mälde.
Sicher esch aber eis: Mundtot gmachd worde isch de T.B. ned. Er hät au us de gschlossene Abteilig vo de psychtrische Klinik Königsfälde us chönne twittere. Nach ganz neue Informatione, wo ois vorliged, wird er hüt um 4i am Namittag entlah und numme no ambulant psychiatrisch betreut.