D Rächnig 2019 schlüsst mit Überschuss

D Gmeind legt de Rächnigsabschluss vor und hät s Ergäbnis markant chönne verbessere. De Ertragsüberschuss ligd be meh wie 3 Millione Franke.
S Budget 2019 schlüsst d Gemeind besser ab, wie erwartet. So esch me bem Budgetiere vomene usglichene operative Ergäbnis usgange, i de Rächnig wird en Überschuss vo 2 Millione Franke usgwise.
Bi de Gmeidschtüüre esch s Ergäbnis um 1.3 Millione Franke schlechter wie budgetierd, bsunders wege de Mindererträg be de Aktieschtüür, schribd d Gmeind i de Mediemitteilig. Wil es be de Sonderschtüüre es Plus vo 0.84 Millione Franke geh het, het me en Teil chönne kompensiere.
De Bereich, uf de d Gmeind Iifluss hät, hät me im Griff, schriibd d Gmeid witer. Schwieriger gsehts bi de Choschte us, uf die me kein Iifluss het: die gsamt Pflägfinanzierig (mit Spitex und MiGel-Koschte) esch um 1 Million über Budget, aber be de Sozialhilf hät me chönne die Mehrchoschte vo de Pfläg chönne kompensiere.
De Buechgwinn, wo me bi de Finanzaalage het chönne erziele, esch nach de Entwicklig a de Finanzmärkt i de letschte Woche kein wirkliche Gwünn.
D Verschuldig esch, bsunders wege de Sanierig vom Tägi, im 2019 witer aagstige und zwar um öppe 15 Millione Franke. Das führt zunere Nettoschuld vo 5’457.00 Franke pro Iiwohner, was dütlich über em Richtwert vom Kanton esch, wo be 2’500.00 Franke ligd.
D Zinslascht het me durch es aktivs Treasuring um 10 % chönne senke und d Gmeind het, um de Kapitaldienscht z optimiere, en Teil vom Fremdkapital in de churzfrischtig Bereich umgschichtet. Us de Minuszinse het me so Zinserträg vo 180’000 Franke chönne erwirtschafte.
Alli Details zur Rächnig gseht me do uf de Website vo de Gmeind Wettige.

Wil d Iiwohnerrotssitzig vom Mai i de Juni verschobe worde esch, wird sich au d Gnehmigung vo de Rächnig entsprächend verzögere.