D Massnahme gege d Usbreitig vom Coronavirus sind z spüre

De Bundesrot het bi de Mediekonferenz am Mentig, 16. März 2020 noii Massnahme gege d Usbreitig vom Coronavirus bekannt geh. D Uswirkige gschpürt me au z Wettige an alle Egge und Ände. Si sind iischnidend aber wichtig, um s Gsundheitssystem vor em Kollaps z bewahre.
Sit Mitternacht bis und mit vorerscht em 19. April dörfed Iikaufsläde, Restaurant, Bars, Unterhaltigs- und Freizitbetriib und Betriib mit personebezogene Dienschtleischtige nüm offe ha.
Numme di für d Versorgig mit Läbesmittel, Medikament und andere wichtige Güeter notwendige Läde, wi Lebensmittelläde, Apotheke, Drogerie, Take-Aways, Betriibskantine, Liferdienscht, Hotel, Tankstelle, Postämter, Banke, … dörfed bi Iihaltig vo de Hygienevorschrifte Kundekontakt ha.
Das het grossi Uswirkige uf de Alltag vo allne. Di eine hend kei Büez, di andere bsunders vil, d Verein müend ihri Versammlige absage, d Rot- und Gmeindhüüser schränke de Zuegang ii, viele Läde und Handwerkbetriib wüssed ned, wi es sell witergoh, wil si vili Koschte hend, aber kei Iinahme. Zudem isch ned klar, ob d Massnahme über de 19. April usse müend verlängerede werde.

Leeri Gstell hüt im Tägipark

Was d Läde aagoht, hend mir hüt im Tägipark vorbiglueged um ois es Bild z mache. Abgseh vom Lebensmittellade, de Apothek und em Kiosk sind alli Läde gschlosse und es het ehnder wenig Lüt gha. D GStell sind teilwiis aber immer no leer. D Lüt hamschtere schints nach wi vor, obwohl es kein Grund defür git. De Bundesrot het jedefalls dezue ufgruefe, solidarisch z si.