Am Fritig, 13. und Samschtig, 14. März isch z Wettige de Iifüehrigskurs vo de noi Iiteilte vo de Füürwehr gsi. Trotz de Virus-Präventionsmassnahme, wo de Bundesrot am Fritig mitteild het, het er ned müesse abbroche werde.
D Massnahme, wo de Bundesrot am Fritig verfüegt het, sind iischniidend. D Schuele sind zue, Veraastaltige mit meh wi 100 Lüt sind verbote, in Restaurants und Bars dörfed nümm meh wi 50 Persone glichzitig si.,… Das het au Uswirkige uf d Füürwehr. Die meischte Üebige sind abgsaid worde und alli plante Kürs sind ins 2021 verschobe worde.
Sit em Fritig am Morge isch z Wettige de Iifüehrigskurs vo de Noiiteilte gloffe, bi dem 90 AdF (32 Fraue und 58 Manne) us 20 Füürwehre d Grundlage vom Füürwehr Handwerker gelehrt hend. Mit 6 Tanklöschfahrzüüg isch im 12 Klasse de Lösch- und Rettigsdienscht gelehrt worde.
Nach em Bekanntewerde vo de Massnahme, wo de Bundesrot gege d Verbreitig vom Coronavirus erloh het, hend mir de Martin Spichale, eine vo de verantwortliche Organisatore vo de Füürwehr Wettige gfröged, ob de Kurs muess abbroche werde. Me het selbstverständlich alli verordnete Massnahme umgsetzt, so de Spichale, und de Kurs chönne regulär beende.
So hets i de Bezirk Brugg, Bade und em Zurzibiet 90 noi usbildeti AdF, wo em Notfall für oisi Sicherheit chönnd sorge.