Nachdem e Mitarbeiteri vom Alterszentrum St. Bernhard positiv uf de Coronavirus teschted worde isch, het d Leitig Massnahme ergriffe. D Bewohnende sind vorübergehend isoliert worde.
Im Alterszentrum St. Bernhard het am 4. März 2020 e Mitarbeiteri Symptom übecho, wo de Verdacht uf en Infektion mit em Coronavirus hend vermuete lah. Im Kantonsspital Bade (KSB) isch si dann positiv uf Corona teschted worde und befinded sich sither in Quarantäne. D Zentrumsleitig het in Abschproch mit de Kantonsärztin sofort di notwendige Massnahme troffe. Sit em Fritig isch s Huus 1, i dem di Mitarbeiteri gschaffed het, isoliert, so dass d Bewohnende kei Bsuech chönnd empfange. Au bi de Pflägende sind di notwendige Massnahme troffe worde, um en Usbreitig vom Virus z unterbinde.
E Bewohneri vom Huus 1 het am Sonntig, 8. März ebefalls di für de Coronavirus typische Symptom gha. S KSB het i dem Fall hüt am Morge aber Entwarnig chönne geh: D Bewohneri isch ned mit em Coronavirus infiziert, sondern het en virale Infekt, wo di Symptom usglöst het. S St. Bernhard het d Mitarbeitende, Bewohnerinne und Bewohner und ihri Aaghörige uf de verschidenschte Kanäl, also per Brief, Mail und über e Hotline informiert und wird si au witerhin uf em Laufende halte.
De Rüdiger Niederer, sit letschte Sommer Gschäftsleiter vom Alterszentrum, betond, dass de Ablauf au vo de Pflägende sehr professionell gsi isch und no isch, au wil für es Alterszentrum de Umgang mit Vire nüd nois sig. Durch Norovire und anderi Infekt, siged immer wider Massnahme notwendig, wo in Absprach mit de kantonale Behörde au i dem Fall professionell gmeischterd worde sind und werded.