D Ablehnig vom Budget am 9. Februar 2020 het Folge. So sind u. a. verschedeni Schuelaaläss abgseid worde.
Kein Wintersporttag i de BEZ, keis Margifäscht, dass sind numme einigi Folge vo de Ablehnig vom Budget. De Gmeindrat hed e Wisig erloo, dass numme no zwingend Usgabe möglich send, so lang keis gültigs Budget vorligd. Das het rächtlichi Gründ.
Mer vo de Wettiger Nochrichte hend einigi enttüschti Reaktione vo Eltere becho, wo sehr enttüschd sind vo dene Entscheid. Das schiint bsunders verständlich wenn mer bedenkd, dass d Gmeind au im Januar 2020 ohni Budget dogschtande esch, aber gliichwohl de Neujahrsapéro und d Landammefiir duregführd hed.
Mir hend de Gmeindamme Roland Kuster für e Stellignahm aagfröged und werded de Artikel ergänze, wenn mer e Antwort vom Gmeindamme händ.