Für d Iiwohnerratssitzig vom Donnschtig, 30. Januar 2020 hed d FDP en dringendi Interpellation zu de Budgetabstimmig iigreichd. D Dringlichkeit esch vom Rat beschlosse und d Interpellation beantworte worde.
S Budget mit ere 5%ige Erhöchig vom Stüürfuess esch umstritten und erst nach de Abstimmig am 9. Februar 2020 wird klar sii, ob d Gmeind no einigi Mönet ohni Budget muess z Schlag cho oder ob de Courant normal cha Iizueg halte. Wird s Budget nach de Rückwisig im Oktober no einisch abglehnt, muess de Regiirigsrot de Stüürfuess und d s Budget feschtlege. D FDP het am Donnschtig im Iiwohnerrot welle wüsse, was das konkret würde heisse.
De Gmeindamme Roland Kuster hed Froge nach de Abstimmig über d Dringlichkeit, wo dütlich aagnoh worde esch, beantwortet. De Stüürfuess, wo de Regiirigsrot würd feschtlege, esch ned klar, so de Kuster. Das würdi erscht prüeft werde und brüüchti öppe 2-3 Mönet. Dodemit chönnt d Gmeind bis öppe April/Mai numme die gebundene Usgabe tätige, sets s Budget abglehnt werde. E vorherigi Stellignahm vom Kanton seg ned iigholt worde, wil es ohni Kenntnis vo de Aktelag eh kei Uskunft würd geh. Die dritt Frog hed sech uf d Abstimmigsunterlage bezoge. D FDP hed welle wüsse, warum d Konsequenze vomene NEI ned i de Abstimmigsunterlage gnennt worde seg und ob dodemit ned d Gfahr vonere Stimmrechtsbeschwerde würd bestoh. Das het me bewusst weggloh, so de Gmeindamme, um d Stimmbürger ned durch e Drohig z beiiflusse.
Wie d Budgetabstimmig usgood, werded mer am 9. Februar 2020 wüsse.