D Sportstadt fiired die erfolgriichschte Dorf-Sportler

Einisch im Jahr ehrt Wettige di erfolgrichschte Sportlerinne und Sportler. Wi scho im letschte Johr au dismol mit eme Mega-Event.
Alli wo Angscht hend, bi de Sportlerehrig würded ihri Stüürgälder «verbrötled» chönned mir beruhige. D Sportlerehrig wird durch Sponsore finanzierd, wo dann au, nebe de Sportlerinne und Sportler und Verträter us de Politik, zu dem Aalass iiglade sind. Wi scho im letschte Johr, het au hüür de Berni Schär de Abig moderierd. Es isch beiidruckend gsi, wi er vo allne Sportler de Palmarès gwüsst het. Ned gwüsst het er aber aafangs, dass d «Sportstadt Wettige» kei Stadt wot si. In de Pause het es ihm aber öpper gsteckt und so betind, wi er vorher vo de «Stadt Wettige» gred het, isch es jetzt s «Dorf Wettige» gsi, was immer wide rzu Lacher gführt het.
Aber jetzt zruck zum Entscheidende vo dem Abig. Di sportliche Leischtige vo Lüt, wo z Wettige läbed oder in Wettiger Verein trainiered, sind jedes Johr vo noiem beidruckend!
Es sind im 2019 11 Schwiizermeischtertitel für Mannschafte gunne worde und 4 Cup-Siig, dodevo 9 vo Mannschafte vom HC Rotwyss. In Einzelwettbewerb het es über 30 Schwiizermeisterschaftstitel geh, ellei 9 vom Lichtathlet Albert Meier i de Kategorie M65. Au für internationali Titel und Medaille hets Ehrige geh. So isch de Karateka Simon Zurfluh Vize-Wältmeischter im Kata worde und im Team-Kata het er zämme mit em Ramon Pfändler und emFlorian Zurflu de 3. Platz belegt. De Marcel Käufeler isch im Curling mit em Team Schwaller Vizeeuropameischter worde und d Karin Suter-Erath het bi de EM im Rollstuehlbadminton im Einzel de 3. Rang gunne.

Do no de Link zu de Föteli, wo de Fabi bim Aalass gmachd het: https://myalbum.com/album/S3FCcUW2jE2a