S grossi Becki im Tägi wird gfülld

Bis zur Eröffnig vom Tägi isch no einiges z mache, aber es goht vorwärts. Zur Ziit wird s Becki für d Schwümmer ufgfüllt.

Für d Gmeind Wettige isch s Tägi e Grossinvestition und Diskussione über d Stüürerhöchig zeiged, dass es immer no Vorbehalt git. Aber d Froid uf d Eröffnig vo de sanierte Aalag wird ebefalls immer grösser. Damit mir oich adäquat chönnd informiere, het d Tägi AG immer wider Mediefüehrige organisierd, so am am Mentig, 20. Januar 2020.

Bis morn set s grossi Becki im Tägi gfülld si. 1220 Kubikmeter Wasser bruuchds dodefür, wo us em eigede Pumpwerk chunnd. S Tägi het das vom EW chönne überneh, wos Pumpwerk im Tägerhardwald in Betriib gnoh worde isch.
Wenn s Becki gfülld isch, wird d Umwälzig teschted und d Filteraalage. Zudem wird Chlor zuegsetzt und de PH- und anderi Wert überprüefd, bis alli Wert de Vorschrifte entspräche.
We de Betriib vo de Badi laufd, wird s Wasser kontinuiirlich ufgfrüscht, me rächned mit 30-40 Liter Wasser pro Badegascht. D Mengi, wo nötig isch, hanged au devo ab, wivil organischs Material d Bsuecherinne und Bsuecher mit ins Wasser bringed. Wenn d Badegäscht, so wi vorgschribe, vorher dusched, dann stiegd de Chloraminghalt im Wasser weniger schnell aa, wi wenn si das ned mached. Au so cha me also di wertvoll Ressource Wasser helfe spare.
En Grossteil vom Wasser cha übrigens nach de entchlorierig direkt i d Limmat abgleited werde. Numme bsunders verschmutzts Wasser, muess über d Kanalistion und dodemit über d ARA Laufäcker z Turgi
D Eröffnig vo de Badi isch für Ändi März vorgseh, s genaue Datum stoht aber no ned fescht. Sicher isch aber scho, wann d Eröffnig miteme Tag vo de offnige Tüüre gfiired wird: das wird am 9. Mai 2020 de Fall si. Es lohnt isch scho jetzt, den Tag i de Agenda z reserviere.