Händ ihr euch au scho gfröged, wer der Heilig Bernhard eigentlich esch, vo dem s Wettiger Alterszentrum de Name hed? Mit de Neuigkeite vom Mittwoch, dass de Neubau im Langäcker doch ned «Altstadt» sondern au St. Bernhard wird heisse, überchund de Name e neui Brisanz.
Mir händ scho am Mittwoch drüber brichted, dass d St. Bernhard AG bschlosse hed, für de Neubau im Langäcker uf de Name «Altstadt» z verzichte und ihn, wie scho s bestehende Alterszentrum am Lägerehang, «St. Bernhard» znenne.
Namenspatron esch de Heilig Bernhard von Clairveaux, wo um 1090 i de Nöchi vo Dijon z Frankrich uf d Wält cho esch. Er esch im 1113 ins Chloster Citeaux iiträte, em Muetterchloster vo allne Zisterzienserchlöster (bi de Gründig vom Zisterziensterchloster Wettige im 1227 esch de Bernhard aber scho lang tot gsi). Scho im 1115 esch er uf Clairvaux gschickt worde, um es Chloster z gründe. Vo dem Chloster esch er dann au grad de erst Abt worde. Er esch massgeblich a de Erneuerig vom chlösterliche Läbe bi de Zisterzienser und de schnälle Usbreitig vo de Zisterzienserchlöster beteiliged gsi. Bekannt esch er aber au für sini Predigte für d Chrüzzüg. In ganz Europa hed er en Sturm vo de Begeischterig defür usglöst. Di Predigte hend ihn au i eusi Gegend gführt. Für d Nacht vom 16. uf de 17. Dezämber 1146 esch belegt, dass er z Birmistorf übernachted hed, vermuetlech i de Chile, wi i dere Ziit üblich gsi esch.
S Alterszäntrum am Lägerehang het de Name natürli ned übercho, will de Bernhard sich für d Chrüzzüg iigsetzt hed, sondern will es i de ehemolige Bernhardtrotte iigrichted worde esch. Di het ihre Name aber vo dem Heilige.