Warum finded de Noijohrsapéro und d Landammefiir au ohni Budget statt?

D Gmeind Birmischtorf het no keis Budget und said de Noijohrsapéro ab und di zuekünftig Grossrotspräsidenti Edith Saner muess für d Wahlfiir 20’000.- Franke vorfinanziire. Warum isch das z’Wettige anderscht?
Ufmerksame Politbeobachter isch ufgfalle, dass es im 2020 zwüsche Birmischtorf und Wettige es paar Parallele git. Beidi Gmeinde veraastalted normalerwiis en Noijohrspéro am 1. Januar, beidi hend im Januar e Wahlfiir planed und beidi hend erscht nach de Urneabstimmig am 9. Februar 2020 es gültigs Budget. Sowit d Gmeinsamkeite.
Aber d Unterschied werfed Froge uf: D Gmeind Birmischtorf het de Noijohrsapéro abgsaid und d Edith Saner wird bi de Wahlfiir am 7. Januar 2020 de Koschteaateil vo de Gmeind in Höchi vo 20’000.- Franke selber finanziire, bis es rächtsgültigs Budget vorligd.
Z Wettige wird de Noijohrsapéro stattfinde und au d Landammefiir am 14. Januar isch vom fehlende Budget ned tangiert.

Mit hend de Martin Süess vom kantonale Rechtsdienscht gfröged, wi d Rächtslag isch. Ohni gültigs Budget dörfed numme gebundeni Usgabe tätiged werde, also settigi wo zwingend sind, said er. Vo daher find er d Birmischtorfer Lösig di korrekteri. Me chönnd aber au argumentiire, so het er usgführt, dass d Budgetposchte für de Noijohrsapéro und d Wahlfiir i de Budgetdiskussione nie es Thema gsi siged und dodemit unbestritte sind. Das sig au d Haltig vom Gmeindrot, het ois de Gmeindschriiber, de Urs Blickenstorfer Uskunft geh. Zudem siged bi de Vorbereitig Verpflichtige iigange worde, wo me ohni Strofzahlige ned hetti chönne uflöse. So muess sich niemed Sorge um di beide Aaläss mache. De Noijohrsapéro wird am 1. Januar und d Wahlfiir wird am 14. Januar stattfinde.