Oisi Redaktion wird noi ufgschtellt

Sit em Usstiig vom Markus Haas us em Redaktionsteam uf de 1. Januar 2018, hend de Fabian Schmid und de Lutz Fischer-Lamprecht als Co-Redaktore alli Themen behandlet und kei inhaltlichi Schwerpünkt gsetzt. Das ändered uf de 1. Januar 2020.

S het eifach z vil Politiker bi de Wettiger Nochrichte, chönnd me säge. De Markus Haas isch vor zwöi Johr us de Redaktion usgschtige, wil er Gmeindrot worde isch. Au jetzt gits en Wechsel und wider us politische Grund. Ab em 1. Januar 2020 isch de Lutz Fischer-Lamprecht für zwöi Johr Vizepräsident und danach designierte Präsident vom Iiwohnerrot. Beidi Ämter erfordered e politischi Neutralität, wo sich us de Sicht vom Redaktionsteam ned mit de Berichterstattig über politische Themene us Wettige vertraid. Us dem Grund werded di beide Co-Redaktore d Arbet ab em 2020 anderscht ufteile. De Lutz schriibd numme no über Themene, wo nüd mit de Wettiger Politik zdue hend, das Ressort wird nunme no vom Fabi betroid. Für Sport, Kultur, Verein und was es alles no git, werded witerhin beidi zueständig si.

A dere Stell wend mir oiserne Läserinne und Läser für di johrelangi Treue danke und wünsched allne es gsägnets Wiehnachtsfäscht und en guete Rutsch ins 2020!