Nach de Sitzig isch vor de Sitzig

Am Mentig, 9. Dezember 2019 het de Iiwohnerrot nachere fascht 4-stündige Diskussion s Budget 2020 gege d Stimme vo de SVP gnehmiged. Morn chunnd de Rot wider zämme, au um de noi Iiwohnerrotspräsident z wähle.
De Iiwohnerrot het am letschte Mentig, 9.Dezember öppe 3 3/4 Stunde über s Budget 2020 diskutierd. Nach de Rückwisig bim erschte Aalauf im Oktober het de Gmeindrot, wi vom Iiwohnerrot gfordered, 4 % vo de 5-prozentige Erhöchig vom Stüürfuess für de Schuldeabbau iiplaned. De Iiwohnerrot het ufgrund vo Aaträg vo de Finanzkommission (Fiko) witeri Chürzige vorgnoh. D Fraktion SP/WettiGrüen het insgsamt 15 Aaträg gschtellt, um Chürzige, wo im noie Budget vorgnoh worde sind, Rückgängig z mache. Meischt sind di 11 Fraktionsmitglider di eizige gsi, wo für ihri Aaträg gstumme hend. Numme wo es um e Chürzig bi de Schuelsozialarbet gange isch, hend EVP/Forum 5430, glp und au vo de FDP und einzelni vo de CVP de Aatrag unterstützt, so dass di Stellereduktion um 20% ned umsetzt wird. S Stimmverhältnis isch bi 28:17 gsi.
Fascht hets au für d Sportkoordinationsstell glanged, wo vo de glp beaatraid und bsunders vo EVP/Forum 5430, aber auch vo SP/WettiGrüen und einzelne vo de bürgerliche Parteie unterstützt worde isch. Dete isch de Aatrag mit 21:22 zruckgwise worde.
Zum Schluss sind es, im Vergliich zum 2. Budgetvorschalg vom Gmeindrot no einisch 187’000 Franke gsi, wo de Iiwhnerrot zuesätzlich iigschpart het. D Schlussabstimmig übers Budget 2020 miteme Stüürfuess vo 100% isch mit 35 : 12 Stimme usgange. S letschti Wort hets Stimmvolk, wo am 9. Februar 2020 übers Budget und de Stüürfuess wird abstimme.

Morn, Donnschtig, 12. Dezember, chunnd de Iiwohnerrot zu sinere letschte Sitzig vom Johr zämme. Nebe verschidene Vorstöss isch d Kreditabrechnig zu «Little Wettige» zum dritte Mol im Rot traktandierd. Wil d Abrechnig zwöimol zruckgwise worde isch, het de Regiirigsrot müesse entscheide. Der betond aber in sinere Stellignahm, dass es ned drum goht, dass de Regiirigsrot em Gmeindrot Décharge würd erteile, sondern numme um e Rechtskontrolle. De Regiirigsrot het de Gmeindrot grüegd, wil er het selle defür Sorg ha, dass de gnehmigd Betrag vo Fr. 30’000.00 möglichscht iighalte wird, aber dass sich kei witeri Massnahme ufdränged und es kei Grundlag für e Haftigsforderig git.
Zudem wird s Rotsbüro für di nächschte zwöi Johr gwählt. ALs Stimmezähler sind de Markus Bader (SVP) und de Heinrich Müller (SP/Wettigrüen) nominierd. S Präsidium sell de bisherig Vizepräsident, de Christian Pauli (FDP) überneh und d Fraktion EVP/Forum 5430 het fürs Vizepräsidium de Lutz Fischer-Lamprecht nominiert, wo dodefür als GPK-Präsident zrucktritt.