Am Mentig isch d Budgetdebatte

Wil de Iiwohnerrot im Oktober 2019 s Budget zruckgwise het, gits nächschti Woche zwöi Iiwohnerrotssitzige. Am Mentig, 9. Dezember isch numme s Budget 2020 traktandiert.

Dass de Stüürfuess vo de Iiwohnergmeind uf 100% wird stiige, isch ned würkli bestritte, jedefalls ned bi de meischte Fraktione im Iiwohnerrot. Umschtritte isch aber, für was das Stüürplus von öppe 2.5 Millione Franke sell bruuchd werde. 2 Millione selled in de Schuldeabbau flüsse, hend di bürgerliche Parteie bschlosse. Gege de Wille vom Gmeindrot, wo i de Mehrheit vo de CVP und de FDP gschtellt wird, also eidütig bürgerlich dominiert isch, het de Iiwohnerrot e Rückwisig vom Budget 2020 duregschtiired. Us dem Grund wird d Budgetdebatte im Iiwohnerrot erscht jetzt gführd. D Meinige, welli Budgetposchte me cha striche und welli ned, gönd wit usenand. Es wird also e kontroversi Diskussion geh, am Mentig ab d 7i am Abe.

Sicher isch scho jetzt, dass Wettige aafangs 2020 ohni Budget wird do stoh. D Volksabstimmig cha nämli frühestens im Februar 2020 stattfinde.