Werded au z Wettige Investitione verhindered?

D Stadtbildkommission z Ännetwettige stoht i de Kritik. Investitione chönnted sich wegem administratibe Ufwand numme no Grossunternehme leischte. Wi gsehts z Wettige us?

D Vorwürf, wo de Dölf Köpfli gegenüber em Badener Tagblatt gegenüber de Stadtbildkommission erhebd, hends in sich. Er het vier Hüser a de Badstross a d Pensionskasse vo de SBB verchaufd, au wil er vo de Stadtbildkommission enttüscht isch. Im Badener Tagblatt isch z läse, dass de Dölf Köpfli de Iidruck gha het, sis Noibauprojäkt a de Badstross sig uf eme gute Gleis, aber d Stadtbildkommission di Uffassig ned teild het. De «immens administrativ Ufwand» und d Erfahrige bi andere Ännetwettiger Bauprojekt hätted dezue gführd, dass er sini vier Hüser verchaufd het.

Mir hend e chli ummeglosst, wi z Wettige d Erfahrige mit de Ortsbildkommission siged. Au do gits Kritik. Eis Problem siged di fehlende klare Kriterie, nach dene grössere Bauprojäkt vo de Kommission beurteilt werded. So sig es für Architekte schwirig z plane. Mir hend Bauherrschafte usfindig gmached, bi dene d Architekte mehrmols Projäkt hend müesse umplane, was d Projäkt verzögered und letschtlich vil Gäld choscht. Ihre Name wot aber niemed im Brichd läse, au us Angscht, es chönnd sich nachteilig uf anderi Bauvorhabe uswirke.

Mir hend au de Gmeindrot für Hochbau, de Martin Egloff für e Stellignahm aagfröged, er het sich aber ned welle üssere.