Het de Drahtzieher vo de Aaschläg vo Paris emol z Wettige gläbt?

Di dütsch Zitig Bild melded, de Abu Musab, eine vo de Drahtzieher vo de Aaschläg vo Paris im November 2015 sig de Thomas-Marcel C. De Maa mit Jahrgang 1987 sell au z Wettige gläbt ha.

De Thomas-Marcel C. sell e bewegti Chindheit gha ha. Wi Radio Argovia geschter gmelded het, isch er z Nussbaume und z Wettige ufgwachse und het au emol ufeme Campingplatz z Frankriich gläbt. Mit 19i isch er mit sinere Muetter uf Frankfurt zügled, wo er e paar Johr spöter zum Islam konvertiert isch. Nachere Züglete uf Bonn het er ghürote und isch Vater worde. Im 2013 isch er uf Syrie um für de IS z kämpfe und het sich ab do Abu Musab gnennt, so schriibd d Bild-Zitig. Im IS sell er dann „Karriere“ gmachd ha. Schints het er no einisch ghürote und isch bis in di höchschte Kreis vom IS ufgschtige. Er sell en eigedi Einheit mit 50 bis 100 Kämpfer gründ und sich selber im Kampf usbilded ha. Und ebe Manne vo dere vo ihm gründedi Einheit selled d Aaschläg, wo am 13. November 2015 z Paris stattgfunde und 130 Mönsche s Läbe koscht hend, verüebd ha. Alleige im Club Bataclan sind a dem Tag 89 Konzertbsuecher ermorded worde.